I helga brakar det laust med Landsdelsstemne i skyting i Gulen. Torsdag, fredag, laurdag og sundag arrangerer Nyborg skyttarlag landsdelskrinsstemne i baneskyting og samstundes Gula skyttarlag i Eivindvik skipar til landsdelsstemne i feltskyting. Over 200 skyttarar er påmelde til stemnene. Siger i Landsdelsstemne heng høgt og ein kan vente seg solide resultat, då det påmeldt mange toppskyttarar.
Landsdelstemnene har innleiande skyting torsdag, fredag kveld og laurdag. På Nyborg skytebane sundag frå kl. 09.30 og utover avviklar ein feltfinalar, samlagsskyting for lag og individuelle banefinalar. Nyborg skyttarlag har ei topp elektronisk bane, der anvisinga vert køyrt på storskjermar i skyttarhuset.
Tidlegare skyttarkonge Lars H. Ese er blant favorittane etter at han i mai tangerte fylkesrekorden og vann Hafslostemnet med heile 349 poeng, men han vil få hard konkurranse frå fleire m.a fjorårsvinnaren Mona Isene som hadde gode plasseringar i Norgescupen førre helg.
Gula skyttarlag skipar til feltskyting i Eivindvik og ein ventar god skyting. I tillegg til ordinær feltskyting, vert det avvikla felthurtigskyting og stangskyting som på landsskyttarstemnet er populære og viktige disiplinar.
Det er fjerde gong sidan 1991 skyttarlaga Gula og Nyborg skipar til desse store idrettsarrangementa og ein håpar at publikum stiller opp og følgjer med i dei spennande tevlingane på skytebanene.
jv
|